بعد التنمر.. ياسمين عز تدافع عن هيفاء وهبي: أعداء النجاح بوظوا فرحتها

نشر: بواسطه/ رانيا عمران

دافعت الإعلامية ياسمين عز عن الفنانة اللبنانية هيفاء وهبي بعد انتشار صورة لها بملامح مشوهة أثناء وجودها بالسعودية لإحياء حفلها بموسم الرياض بشكل عام 

ياسمين عز تدافع عن هيفاء..

 وقالت الإعلامية ياسمين عز خلال برنامجها: هيفاء وهبي كان عندها حفلة في موسم الرياض وكسرت الدنيا أعداء النجاح واللي بيغيروا منها بوظوا عليها فرحتها بالحقد والغيرة وجابوا فيديو متصور بكاميرا موبيل بزاوية من تحت وصور وعملوا عليها فوتشوب وحاجات مش موجودة وينشروها ويكتبوا عليها إلحق هيفاء بتخدعنا بشكلها ولكن هي الست أصلا ربنا خالقها جميلة.

وأضافت الإعلامية ياسمين عز: ما تلعبش انت في الصور وتيجي تقول هي دي هيفاء، لأ هيفاء جميلة وعندها الاتنين جمال الشكل وجمال الروح وواثقة في نفسها جدا هي زي الطفلة البريئة وكانت بترد على أسئلة الصحفيين بكل أدب ليه ما تكلمناش عن حفلتها اللي كسرت الدنيا وهي نجمة مافيهاش غلطة، لكن الغيرة والحقد هما اللي بيخلوا أصحابهم ياخدوا الجانب السيئ، وأي حد هيصور نفسه من تحت كلكوا هتطلعوا عفاريت وأي واحد فاهم تصوير هيعرف كده وده نفس اللي حصل مع هيفاء.